Topkapı Sarayı Kubbealtı Tamir Kitâbeleri

Sağ Taraftaki Tamir Kitâbesi

Selîm Hân-ı keremver kâm-yâb etdikde devrânı
Cihânın intizâma tutdu yüz hâl-i perîşânı

Müceddid olduğu dünyâ vü dîne gûnden ezherdir
Odur sâhib-kırân-ı nev-zuhûr-ı nesl-i ‘Osmânî

Cihânı yapdırıp ma‘mûre-i emn ü amân eyler
Yıkar a‘dâ-yı dînin başına dünyâ-yı vîrânı

Nizâm-ı nev verip tecdîd eder bünyân-ı ikbâli
Bunu ilhâh eder da‘îm ona tevfik-i Yezdânî

Keremde pehlivândır hamlesinde şîr-i garrândır
Sözünde kahramândır vasf olunmaz şevket ü şânı

Bilir tertîb-i devlet resmini baht-ı hümâyûnu
Mülûk-ü sâlife san bundan öğrenmiş cihânbânı

Kılıb ta‘yîn-i hidmet fark ü temyîz eyledi bir bir
Gürûh-ı ‘askeri ve zümre-i a‘yân u erkânı

Bu divângâh-ı ‘âlîyi bu resme eylemek ta‘mîr
Meğer lâzım değil miydi açarsan çeşm-i im‘ânı

‘Aceb tarz-ı bülende koydu el-hak eyleyip tekmîl
Nizâm-ı dîni resm-i devleti nâmus-u şâhânı

Mu‘allâ kubbe-i eflâki gûyâ indirip hâke
Harîminde nümûdâr eyledi sâf saf sürûşânı

Temâşâsında mahşergâh-ı dehşet ‘aks eder câna
Der ü dîvârı nüzzâra olup mir‘ât-ı hayrânı

Huzûra yüz süren erkân-ı devlet çarh-ı rıf‘atden
En evvel seyr ederler hâk-bûs-ı mihr-i tâbânı

Bu resm-i nev-zuhûr enmûzec olsun çeşm-i a‘dâya
Cihâd esbâbını hem böyle tanzîm eyler ‘irfânı

O bir şâh-ı cihân-ı rüşd ü himmetdir ki el-hâsıl
Bulunmaz lâciverdî kubbenin altında akrânı

Çıkıp kânûn-u devlet perdeden olmuşdu bî-âheng
Şifâ-sâz oldu ihyâ eyledi Sultân Süleymân’ı

Sükûn-u pür-temekkündir ‘alâmet hamle-i şîre
Bu ârâm etdirir a‘dâ-yı dîne teng meydânı

Tesettür kılsa topun sînesinde gülle aldanma
Eğer gürlerse gürler ra‘d u berk-i kahr-ı Sübhânı

Ne dem endîşesi tedbîr ile başlarsa teshîre
Alır iklîm-i gayb-ı lâ-mekânı mülk-i imkânı

Hemîşe zâtına ikbâl ü şevketle murâdınca
Mübârek ede Mevlâ yapdığı âsâr u ‘ümrânı

Edip te’yîd re’yin mu‘cizât-ı seyyidü’l-kevneyn
Kerâmât-ı bülend-i evliyâ olsun nigehbânı

Füyûz-u sırr-ı ilhâmiyle Gâlib geldi bir târîh
Selîm Hân yapdı hem-tâk-ı felek bu cây-ı dîvânı
1207 

Sol Taraftaki Tamir Kitâbesi

Şehinşâh-ı cihân Mahmûd Hân-ı ma‘delet-pîrâ
Mu‘allâ cây-ı dîvânı mücedded eyledi ihyâ

Müşebbek revzeni zencîr-i ‘adlin bir ‘adîlidir
Bilâ-tahrîk eder Hak sâhibin ol husreve îmâ

Selîm Hân-ı cinân-menzil edip ancak zemînin tarh
Müzeyyen etdi ‘adl ü dâd ile şâh-ı zamân hâlâ

Felekler bu mu‘allâ Kubbealtı’ndan ‘ibâretdir
‘Adâlet olmasa olmaz sipihr-i köhne pâ-ber-câ

Vekîl-i saltanat sadreyn ü defderdâr ve tevkî‘î
Olur dîvân günü bu âsumâna encüm-i zehrâ

Sipihr-i şevketin ahkâmını seyr etmeğe gâhî
Tulû‘ eyler verâ-yı zer-kafesden ol meh-i garrâ

Huzûr-u hazret-i Hakk’a kalır zîrâ müzevverdir
‘Adâletgâh-ı hâkânîde faysal bulmayan da‘vâ

Bu nev-câyın verâsı kulle-i Kâf-ı ‘adâletdir
Ayağı altına düşse nola dünyâ vü mâ-fîhâ

Sipihr-i kîne-cûyı mehcesiyle dâğdâr etdi
‘Âlem-efrâz olunca kulle-i nev âiftâb-âsâ

‘Îyân etdi o vâlâ kulleyi bünyâd edip zımnen
Nigehbân olduğun âfâka ol hâkân-ı mülk-ârâ

O rütbe mülke te‘sîr etdi ol şehden mehâbet-kim
Murâd etse künâm-ı şîri eyler âhüvân yağmâ

Dilerse mîşezârı mehd eder bir peççe rûbâha
Dilerse şîr-i nerri tıfl-ı âhûya eder lala

Feridûnlar o şâha ‘arz-ı hâcet eylesün gelsin
Penâh-ı pâdişâhân eyledi dergâhını Mevlâ

İki zerrîn tasa saltanat tâcın verirlerdi
Rikâbında gelüp peyk olmuş olsa Sencer ü Dârâ

Sıtablında eger Pervîz olaydı bir at oğlanı
Anar mıydı cihânda edhem-i Şebdîz’ini hâşâ

Nüvîd-i feth için tatar olaydı böyle hâkâna
Eder miydi Hülâgû ‘ömrünü ılgar ile ifnâ

Açın dest-i niyâzı dâ‘îm olsun dâver-i gâzî
Sözüm ger hak ise ey sâkinân-ı ‘âlem-i bâlâ

O hâkân sıdk ile kıldı cenâb-ı Ahmed’e hıdmet
Kitâbullâhın etdi seyf ile ahkâmını inbâ

Yine çıkdım sadedden kaldı bu câyın biraz vasfı
Alışmış medh-i hâkâna zebân-ı hâme-i imlâ

Saded bir yana dursun şevk u şâdîden gider ‘aklım
O şâhı yâd ederken mâlik olmam kendime kat‘â

Bulaydım bâri bir mısrâ‘-ı ra’nâ cây-ı zîbâya
Kusurum olsa da ‘avf eyler ol şâh-ı kerem-fermâ

Gören ser-dâde-i insâf olur ‘İzzet bu târîhe
Mücedded eyledi dîvân yerin Mahmûd Hân vâlâ

1235 

Fotograflar: H.Veysel Güleryüz

Kubbealtı'nın ve tamir kitâbelerinin dışarıdan görünümü.

Kubbealtı'nın diğer bir görünümü.

Kubbealı'nda yapılan bir toplantının eski bir resmi

Topkapı Sarayı Kubbealtı (Dîvan-ı Hümâyûn)